zamane ke jhamelon se mujhe kya
meri jaan! main tumhaara aadmi hun

Anwar Shuoor

---

---

har ishq ke manzar mein tha ek hijr ka manzar
ek wasl ka manzar kisi manzar mein nahin tha

Aqeel Abbas Jafri

---

---

mohabbat soz bhi hai saz bhi hai
KHamoshi bhi hai ye aawaz bhi hai

Arsh Malsiyani

---

---

suKHan ke chaak mein pinhan tumhaari chahat hai
wagarna kuza-gari ki kise zarurat hai

Arshad Abdul Hamid

---

---

husn o ishq ki lag mein aksar chheD udhar se hoti hai
shama ki shoala jab lahrai uD ke chala parwana bhi

Arzoo Lakhnavi

---

---

jo dil rakhte hain sine mein wo kafir ho nahin sakte
mohabbat din hoti hai wafa iman hoti hai

Arzoo Lakhnavi

---

---

mohabbat nek-o-bad ko sochne de ghair-mumkin hai
baDhi jab be-KHudi phir kaun Darta hai gunahon se

Arzoo Lakhnavi

---

---