dushman-e-jaan hi sahi sath to ek umr ka hai
dil se ab dard ki ruKHsat nahin dekhi jati

Akhtar Saeed Khan

---

---

dil mein leta hai chuTkiyan koi
hae is dard ki dawa kya hai

Akhtar Shirani

---

---

dard baDh kar dawa na ho jae
zindagi be-maza na ho jae

Aleem Akhtar

---

---

dard ka phir maza hai jab 'aKHtar'
dard KHud chaarasaz ho jae

Aleem Akhtar

---

---

lazzat-e-dard mili ishrat-e-ehsas mili
kaun kahta hai hum us bazm se nakaam aae

Ali Jawwad Zaidi

---

---

shab ke sannaTe mein ye kis ka lahu gata hai
sarhad-e-dard se ye kis ki sada aati hai

Ali Sardar Jafri

---

---

ek dard ho bas aaTh pahar dil mein ki jis ko
taKHfif dawa se ho na taskin dua se

Altaf Hussain Hali

---

---