jama kar ke dard sare tu ne paida dil kiya
kah tu ai dast-e-qaza is se kya hasil kiya

Meer Ziauddin Zia

---

---

kaun se zaKHm ka khula Tanka
aaj phir dil mein dard hota hai

Meer Ziauddin Zia

---

---

uswaiyon ki apni mujhe kuchh hawas nahin
naseh pa kya karun ki mera dil pe bas nahin

Meer Ziauddin Zia

---

---

gham ke bharose kya kuchh chhoDa kya ab tum se bayan karen
gham bhi ras aaya dil ko aur hi kuchh saman karen

Meeraji

---

---

'mir' mile the 'mira-ji' se baaton se hum jaan gae
faiz ka chashma jari hai hifz un ka bhi diwan karen

Meeraji

---

---

nagri nagri phira musafir ghar ka rasta bhul gaya
kya hai tera kya hai mera apna paraya bhul gaya

Meeraji

---

---

aaKHir gil apni sarf-e-dar-e-mai-kada hui
pahunchi wahin pe KHak jahan ka KHamir tha

Meerza Jawan Bakht Jahandar

---

---