kisi bhi ghar mein sahi raushni to hai hum se
numud-e-subh se pahle to mat bujhao hamein

Manzar Ayubi

---

---

kisi lab pe harf-e-sitam to ho koi dukh supurd-e-qalam to ho
ye baja ki shahr-e-malal mein koi 'faiz' hai koi 'mir' hai

Manzar Ayubi

---

---

aandhiyan zor dikhaen bhi to kya hota hai
gul khilane ka hunar baad-e-saba jaanti hai

Manzar Bhopali

---

---

aankh bhar aai kisi se jo mulaqat hui
KHushk mausam tha magar TuT ke barsat hui

Manzar Bhopali

---

---

aap hi ki hai adalat aap hi munsif bhi hain
ye to kahiye aap ke aib-o-hunar dekhega kaun

Manzar Bhopali

---

---

ab samajh lete hain miThe lafz ki kaDwahaTen
ho gaya hai zindagi ka tajraba thoDa bahut

Manzar Bhopali

---

---

ap bojh Dhota tha kya jahez de pata
is liye wo shahzadi aaj tak kunwari hai

Manzar Bhopali

---

---