kahan bach kar chali ai fasl-e-gul mujh aabla-pa se
mere qadmon ki gul-kari bayaban se chaman tak hai

Majrooh Sultanpuri

---

---

koi ham-dam na raha koi sahaara na raha
hum kisi ke na rahe koi hamara na raha

Majrooh Sultanpuri

---

---

kuchh bata tu hi nasheman ka pata
main to ai baad-e-saba bhul gaya

Majrooh Sultanpuri

---

---

main akela hi chala tha jaanib-e-manzil magar
log sath aate gae aur karwan banta gaya

Majrooh Sultanpuri

---

---

main ki ek mehnat-kash main ki tirgi-dushman
subh-e-nau ibarat hai mere muskurane se

Majrooh Sultanpuri

---

---

'majruh' likh rahe hain wo ahl-e-wafa ka nam
hum bhi khaDe hue hain gunahgar ki tarah

Majrooh Sultanpuri

---

---

'majruh' qafile ki mere dastan ye hai
rahbar ne mil ke luT liya rahzan ke sath

Majrooh Sultanpuri

---

---