hudud-e-shahr se bahar bhi bastiyan phailin
simaT ke rah gae yun jangalon ke ghere bhi

Khaleel Tanveer

---

---

is bhare shahr mein din raat Thaharte hi nahin
kaun yaadon ke safar-name ko tahrir kare

Khaleel Tanveer

---

---

jin ko zamin dida-e-dil se aziz thi
wo kam-nigah log the hijrat na kar sake

Khaleel Tanveer

---

---

jo zaKHm deta hai to be-asar hi deta hai
KHalish wo de ki jise bhul bhi na paun main

Khaleel Tanveer

---

---

kise KHayal tha miTti hui ibarat ka
mahak raha tha chaman-dar-chaman samaat ka

Khaleel Tanveer

---

---

lauh-e-jahan pe is tarah likkha gaya hun mein
jis ka koi jawab nahin wo sawal hun

Khaleel Tanveer

---

---

main kya hun kaun hun kya chiz mujh mein muzmar hai
kai hijab uThae magar hijab mein hun

Khaleel Tanveer

---

---