dard zanjir ki surat hai dilon mein maujud
is se pahle to kabhi is ke ye pairae na the

Afzal Minhas

---

---

dil ki masjid mein kabhi paDh le tahajjud ki namaz
phir sahar ke waqt honTon par dua bhi aaegi

Afzal Minhas

---

---

ek hi fankar ke shahkar hain duniya ke log
koi bartar kis liye hai koi kam-tar kis liye

Afzal Minhas

---

---

hawa ke phul mahakne lage mujhe pa kar
main pahli bar hansa zaKHm ko chhupae hue

Afzal Minhas

---

---

insan be-hisi se hai patthar bana hua
munh mein zaban bhi hai lahu bhi ragon mein hai

Afzal Minhas

---

---

jaane ye hiddat chaman ko ras aae ya nahin
aag jaisi kaifiyat hai KHushbuon ki lahr mein

Afzal Minhas

---

---

kya faisla diya hai adalat ne chhoDiye
mujrim to apne jurm ka iqbaal kar gaya

Afzal Minhas

---

---