kaun si aisi kami mere KHad-o-KHal mein hai
aaina KHush nahin hota kabhi mil kar mujh se

Afzal Gauhar Rao

---

---

kis pyas se KHali hua mashkiza hamara
dariya se jo uTh aae hain sahra ki taraf hum

Afzal Gauhar Rao

---

---

kya musibat hai ki har din ki mashaqqat ke ewaz
bandh jata hai koi raat ka patthar mujh se

Afzal Gauhar Rao

---

---

main ek ishq mein nakaam kya hua 'gauhar'
har ek kaam mein mujh ko KHasara hone laga

Afzal Gauhar Rao

---

---

meri nazar to KHalaon ne bandh rakkhi thi
mujhe zamin se kahan aasman dikhai diya

Afzal Gauhar Rao

---

---

meri to aankh mera KHwab TuTne se khuli
na jaane panw dhara nind mein kahan main ne

Afzal Gauhar Rao

---

---

tumhein hi sahra sambhaalne ki paDi hui hai
nikal ke ghar se bhi hum to ghar se bandhe hue hain

Afzal Gauhar Rao

---

---