chalte rahe hum tund hawaon ke muqabil
'azad' charagh-e-tah-e-daman na rahe hum

Jagan Nath Azad

---

---

DhunDhne par bhi na milta tha mujhe apna wajud
main talash-e-dost mein yun be-nishan tha dosto

Jagan Nath Azad

---

---

hum ne bura bhala hi sahi kaam to kiya
tum ko to e'tiraaz hi karne ka shauq tha

Jagan Nath Azad

---

---

ibtida ye thi ki main tha aur dawa ilm ka
intiha ye hai ki is dawe pe sharmaya bahut

Jagan Nath Azad

---

---

ek bar agar qafas ki hawa ras aa gai
ai KHud-fareb phir hawas-e-baal-o-par kahan

Jagan Nath Azad

---

---

is se ziyaada daur-e-junun ki KHabar nahin
kuchh be-KHabar se aap the kuchh be-KHabar se hum

Jagan Nath Azad

---

---

kinare hi se tufan ka tamasha dekhne wale
kinare se kabhi andaza-e-tufan nahin hota

Jagan Nath Azad

---

---