manzilen samten badalti ja rahi hain roz o shab
is bhari duniya mein hai insan tanha rah-rau

Fuzail Jafri

---

---

mizaj alag sahi hum donon kyun alag hon ki hain
sarab o aab mein poshida qurbaten kya kya

Fuzail Jafri

---

---

talluqat ka tanqid se hai yarana
kisi ka zikr kare kaun ehtisab ke sath

Fuzail Jafri

---

---

tere badan mein mere KHwab muskuraate hain
dikha kabhi mere KHwabon ka aaina mujh ko

Fuzail Jafri

---

---

ye sach hai hum ko bhi khone paDe kuchh KHwab kuchh rishte
KHushi is ki hai lekin halqa-e-shar se nikal aae

Fuzail Jafri

---

---

zahr miTha ho to pine mein maza aata hai
baat sach kahiye magar yun ki haqiqat na lage

Fuzail Jafri

---

---

zid mein duniya ki bahar-haal mila karte the
warna hum donon mein aisi koi ulfat bhi na thi

Fuzail Jafri

---

---