uk gaya aa ke jahan qafila-e-rang-o-nashat
kuchh qadam aage zara baDh ke makan hai mera

Aslam Mahmood

---

---

tamam umr jise main ubur kar na saka
darun-e-zat mere be-kanar sa kuchh hai

Aslam Mahmood

---

---

tegh-e-nafas ko bahut naz tha raftar par
ho gai aaKHir mere KHun mein naha kar KHamosh

Aslam Mahmood

---

---

tere kuche ki hawa puchhe hai ab hum se
nam kya hai kya nasab hai hum kahan ke hain

Aslam Mahmood

---

---

wo dard hun koi chaara nahin hai jis ka kahin
wo zaKHm hun ki hai dushwar indimal mera

Aslam Mahmood

---

---

yahi nahin ki kisi yaad ne malul kiya
kabhi kabhi to yunhi be-sabab bhi roe hain

Aslam Mahmood

---

---

anjaane logon ko har su chalta phirta dekh raha hun
kaisi bhiD hai phir bhi KHud ko tanha tanha dekh raha hun

Asrar Zaidi

---

---