jaane wale ko kahan rok saka hai koi
tum chale ho to koi rokne wala bhi nahin

Aslam Ansari

---

---

jise darpesh judai ho use kya malum
kaun si baat ko kis tarah bayan hona hai

Aslam Ansari

---

---

ju-e-naghmat pe taswir si larzan dekhi
lab-e-taswir pe Thahra hua naghma dekha

Aslam Ansari

---

---

KHafa na ho ki tera husn hi kuchh aisa tha
main tujh se pyar na karta to aur kya karta

Aslam Ansari

---

---

kise kahen ki rifaqat ka dagh hai dil par
bichhaDne wala to khul kar kabhi mila hi na tha

Aslam Ansari

---

---

ag-e-har-saz ye kahti hai ki ai naghma-taraaz
mujh ko ek saltanat-e-saut-o-sada chahiye thi

Aslam Ansari

---

---

uDa hai rafta rafta rang taswir-e-mohabbat ka
hui hai rasm-e-ulfat be-wiqar aahista aahista

Aslam Ansari

---

---