KHak kar dewe jala kar pahle phir Tiswe bahae
shama majlis mein baDi dil-soz parwane ki hai

Shaikh Zahuruddin Hatim

---

---

KHaksaron ka dil KHazina hai
is zamin mein bhi kuchh dafina hai

Shaikh Zahuruddin Hatim

---

---

khel sab chhoD khel apna khel
aap qudrat ka tu khilauna hai

Shaikh Zahuruddin Hatim

---

---

KHuda ke waste us se na bolo
nashe ki lahr mein kuchh bak raha hai

Shaikh Zahuruddin Hatim

---

---

KHuda ko jis se pahunchen hain wo aur hi rah hai zahid
paTakte sar teri go ghis gai sajdon se peshani

Shaikh Zahuruddin Hatim

---

---

khul gai jis ki aankh misl-e-habab
ghar ko apne KHarab jaane hai

Shaikh Zahuruddin Hatim

---

---

KHum-KHana mai-kashon ne kiya is qadar tahi
qatra nahin raha hai jo shishe nichoDiye

Shaikh Zahuruddin Hatim

---

---

KHuban-e-jahan hon jis se tasKHir
aisa koi hum ne hunar na dekha

Shaikh Zahuruddin Hatim

---

---

kis se kahun main haal-e-dil apna ki ta sune
is shahr mein raha bhi koi dard-mand hai

Shaikh Zahuruddin Hatim

---

---