سلیقہ جن کو ہوتا ہے غم دوراں میں جینے کا
وہ یوں شیشے کو ہر پتھر سے ٹکرایا نہیں کرتے

نشور واحدی

---

---

کس بے بسی کے ساتھ بسر کر رہا ہے عمر
انسان مشت خاک کا احساس لیے ہوئے

نشور واحدی

---

---

معاذ اللہ مے خانے کے اوراد سحرگاہی
اذاں میں کہہ گیا میں ایک دن یا پیر مے خانہ

نشور واحدی

---

---

میں ابھی سے کس طرح ان کو بے وفا کہوں
منزلوں کی بات ہے راستے میں کیا کہوں

نشور واحدی

---

---

میں تنکوں کا دامن پکڑتا نہیں ہوں
محبت میں ڈوبا تو کیسا سہارا

نشور واحدی

---

---

میری آنکھوں میں ہیں آنسو تیرے دامن میں بہار
گل بنا سکتا ہے تو شبنم بنا سکتا ہوں میں

نشور واحدی

---

---

نشورؔ آلودۂ عصیاں سہی پر کون باقی ہے
یہ باتیں راز کی ہیں قبلۂ عالم بھی پیتے ہیں

نشور واحدی

---

---

قدم مے خانہ میں رکھنا بھی کار پختہ کاراں ہے
جو پیمانہ اٹھاتے ہیں وہ تھرایا نہیں کرتے

نشور واحدی

---

---

زندگی پرچھائیاں اپنی لیے
آئنوں کے درمیاں سے آئی ہے

نشور واحدی

---

---