jab tujh ko tamanna meri thi tab mujh ko tamanna teri thi
ab tujh ko tamanna ghair ki hai to teri tamanna kaun kare

Moin Ahsan Jazbi

---

---

abhi sumum ne mani kahan nasim se haar
abhi to marka-ha-e-chaman kuchh aur bhi hain

Moin Ahsan Jazbi

---

---

jab kashti sabit-o-salim thi sahil ki tamanna kis ko thi
ab aisi shikasta kashti par sahil ki tamanna kaun kare

Moin Ahsan Jazbi

---

---

jab kabhi kisi gul par ek zara nikhaar aaya
kam-nigah ye samjhe mausam-e-bahaar aaya

Moin Ahsan Jazbi

---

---

ek pyas bhare dil par na hui tasir tumhaari nazron ki
ek mom ke be-bas TukDe par ye nazuk KHanjar TuT gae

Moin Ahsan Jazbi

---

---

hazar bar kiya azm-e-tark-e-nazzara
hazar bar magar dekhna paDa mujh ko

Moin Ahsan Jazbi

---

---

hamin hain soz hamin saz hain hamin naghma
zara sambhal ke sar-e-bazm chheDna hum ko

Moin Ahsan Jazbi

---

---

dil-e-nakaam thak ke baiTh gaya
jab nazar aai manzil-e-maqsud

Moin Ahsan Jazbi

---

---

allah-re be-KHudi ki chala ja raha hun main
manzil ko dekhta hua kuchh sochta hua

Moin Ahsan Jazbi

---

---