allah-re bhulapa munh dho ke KHud wo bole
sungho to ho gaya ye pani gulab kyunka

Jurat Qalandar Bakhsh

---

---

aankh lagti nahin 'jurat' meri ab sari raat
aankh lagte hi ye kaisa mujhe aazar laga

Jurat Qalandar Bakhsh

---

---

aaya tha shab ko chhup ke wo rashk-e-chaman so aah
phaili ye ghar mein bu ki mohalla mahak gaya

Jurat Qalandar Bakhsh

---

---

aastin-e-mauj dariya se juda hoti nahin
rabt tera chashm se kyun aastin jata raha

Jurat Qalandar Bakhsh

---

---

aaluda-ba-KHun chashm se Tapke hai jo aansu
sab kahte hain hairat se ye moti hai ki munga

Jurat Qalandar Bakhsh

---

---

aalam-e-masti mein mere munh se kuchh nikla jo raat
bol uTha tewari chaDha kar wo but-e-mai-KHwar chup

Jurat Qalandar Bakhsh

---

---

aaj ghera hi tha use main ne
kar ke iqrar mujh se chhuT gaya

Jurat Qalandar Bakhsh

---

---

aage tha dil hi mera ab hai khuda aap ka nam
zauq se samajhiye aap is ko nagina apna

Jurat Qalandar Bakhsh

---

---

aankh uTha kar use dekhun hun to nazron mein mujhe
yun jatata hai ki kya tujh ko nahin Dar mera

Jurat Qalandar Bakhsh

---

---