fursat-e-kar faqat chaar ghaDi hai yaro
ye na socho ki abhi umr paDi hai yaro

Jaan Nisar Akhtar

---

---

aankhen jo uThae to mohabbat ka guman ho
nazron ko jhukae to shikayat si lage hai

Jaan Nisar Akhtar

---

---

dil ko har lamha bachate rahe jazbaat se hum
itne majbur rahe hain kabhi haalat se hum

Jaan Nisar Akhtar

---

---

dekhun tere hathon ko to lagta hai tere hath
mandir mein faqat dip jalane ke liye hain

Jaan Nisar Akhtar

---

---

aur kya is se ziyaada koi narmi bartun
dil ke zaKHmon ko chhua hai tere galon ki tarah

Jaan Nisar Akhtar

---

---

ashaar mere yun to zamane ke liye hain
kuchh sher faqat un ko sunane ke liye hain

Jaan Nisar Akhtar

---

---

ab ye bhi nahin Thik ki har dard miTa den
kuchh dard kaleje se lagane ke liye hain

Jaan Nisar Akhtar

---

---

aaj to mil ke bhi jaise na mile hon tujh se
chaunk uThte the kabhi teri mulaqat se hum

Jaan Nisar Akhtar

---

---

aahaT si koi aae to lagta hai ki tum ho
saya koi lahrae to lagta hai ki tum ho

Jaan Nisar Akhtar

---

---