main tujh se sath bhi to umar bhar ka chahta tha
so ab tujh se gila bhi umar bhar ka ho gaya hai

Irfan Sattar

---

---

main jag jag ke kis kis ka intizar karun
jo log ghar nahin pahunche wo mar gae honge

Irfan Sattar

---

---

kya bataun ki jo hangama bapa hai mujh mein
in dinon koi bahut saKHt KHafa hai mujh mein

Irfan Sattar

---

---

koi mila to kisi aur ki kami hui hai
so dil ne be-talabi iKHtiyar ki hui hai

Irfan Sattar

---

---

kisi aahaT mein aahaT ke siwa kuchh bhi nahin ab
kisi surat mein surat ke siwa kya rah gaya hai

Irfan Sattar

---

---

kis ajab saat-e-nayab mein aaya hua hun
tujh se milne main tere KHwab mein aaya hua hun

Irfan Sattar

---

---

jo aql se badan ko mili thi, wo thi hawas
jo ruh ko junun se mila hai, ye ishq hai

Irfan Sattar

---

---

is mein nahin hai daKHl koi KHauf o hirs ka
is ki jaza, na is ki saza hai, ye ishq hai

Irfan Sattar

---

---

ek chubhan hai ki jo bechain kiye rahti hai
aisa lagta hai ki kuchh TuT gaya hai mujh mein

Irfan Sattar

---

---