saqiya aisa pila de mai ka mujh ko jam talKH
zindagi dushwar ho aur ho mujhe aaram talKH
Haqeer
KHub mil kar gale se ro lena
is se dil ki safai hoti hai
Haqeer
ki kisi par na jafa mere baad
KHub roe wo suna mere baad
Haqeer
kya jaanen un ki chaal mein eajaz hai ki sehr
wo bhi unhin se mil gae jo the hamare log
Haqeer
kyun na kabe ko kahun allah ka aur but ka ghar
wo bhi mere dil mein hai aur ye bhi mere dil mein hai
Haqeer
mujhe ab maut behtar zindagi se
wo ki tum ne sitamgari ki tauba
Haqeer
TuTen wo sar jis mein teri zulf ka sauda nahin
phuTen wo aankhen ki jin ko did ka lapka nahin
Haqeer
yak-ba-yak tark na karna tha mohabbat mujh se
KHair jis tarah se aata tha wo aata jata
Haqeer
ya us se jawab-e-KHat lana ya qasid itna kah dena
bachne ka nahin bimar tera irshad agar kuchh bhi na hua
Haqeer