mohabbat ki gawahi apne hone ki KHabar le ja
jidhar wo shaKHs rahta hai mujhe ai dil! udhar le ja

Ghulam Mohammad Qasir

---

---

sayon ki zad mein aa gain sari ghulam-gardishen
ab to kaniz ke liye rah-e-farar bhi nahin

Ghulam Mohammad Qasir

---

---

pyar gaya to kaise milte rang se rang aur KHwab se KHwab
ek mukammal ghar ke andar har taswir adhuri thi

Ghulam Mohammad Qasir

---

---

pahle ek shaKHs meri zat bana
aur phir puri kaenat bana

Ghulam Mohammad Qasir

---

---

nam likh likh ke tera phul banane wala
aaj phir shabnamin aankhon se waraq dhota hai

Ghulam Mohammad Qasir

---

---

kitab-e-arzu ke gum-shuda kuchh bab rakkhe hain
tere takiye ke niche bhi hamare KHwab rakkhe hain

Ghulam Mohammad Qasir

---

---

kashti bhi nahin badli dariya bhi nahin badla
aur Dubne walon ka jazba bhi nahin badla

Ghulam Mohammad Qasir

---

---

KHushbu giraft-e-aks mein laya aur us ke baad
main dekhta raha teri taswir thak gai

Ghulam Mohammad Qasir

---

---

sab se achchha kah ke us ne mujh ko ruKHsat kar diya
jab yahan aaya to phir sab se bura bhi main hi tha

Ghulam Mohammad Qasir

---

---