shikayaten bhi bahut hain hikayaten bhi bahut
maza to jab hai ki yaron ke ru-ba-ru kahiye

Ali Sardar Jafri

---

---

purane sal ki ThiThuri hui parchhaiyan simTin
nae din ka naya suraj ufuq par uThta aata hai

Ali Sardar Jafri

---

---

pyas jahan ki ek bayaban teri saKHawat shabnam hai
pi ke uTha jo bazm se teri aur bhi tishna-kaam uTha

Ali Sardar Jafri

---

---

sau milin zindagi se saughaten
hum ko aawargi hi ras aai

Ali Sardar Jafri

---

---

shab ke sannaTe mein ye kis ka lahu gata hai
sarhad-e-dard se ye kis ki sada aati hai

Ali Sardar Jafri

---

---

ye kis ne phone pe di sal-e-nau ki tahniyat mujh ko
tamanna raqs karti hai taKHayyul gungunata hai

Ali Sardar Jafri

---

---

ye tera gulistan tera chaman kab meri nawa ke qabil hai
naghma mera apne daman mein aap apna gulistan lata hai

Ali Sardar Jafri

---

---

ye mai-kada hai yahan hain gunah jam-ba-dast
wo madrasa hai wo masjid wahan milega sawa

Ali Sardar Jafri

---

---

phuTne wali hai mazdur ke mathe se kiran
surKH parcham ufuq-e-subh pe lahraate hain

Ali Sardar Jafri

---

---