KHazine jaan ke luTane wale dilon mein basne ki aas le kar
suna hai kuchh log aise guzre jo ghar se aae na ghar gae hain

Ada Jafri

---

---

log be-mehr na hote honge
wahm sa dil ko hua tha shayad

Ada Jafri

---

---

kuchh itni raushni mein the chehron ke aaine
dil us ko DhunDhta tha jise jaanta na tha

Ada Jafri

---

---

koi tair idhar nahin aata
kaisi taqsir is makan se hui

Ada Jafri

---

---

koi baat KHwab-o-KHayal ki jo karo to waqt kaTega ab
hamein mausamon ke mizaj par koi e'tibar kahan raha

Ada Jafri

---

---

kin manzilon luTe hain mohabbat ke qafile
insan zamin pe aaj gharib-ul-watan sa hai

Ada Jafri

---

---

KHamushi se hui fughan se hui
ibtida ranj ki kahan se hui

Ada Jafri

---

---

kanTa sa jo chubha tha wo lau de gaya hai kya
ghulta hua lahu mein ye KHurshid sa hai kya

Ada Jafri

---

---

kaTta kahan tawil tha raaton ka silsila
suraj meri nigah ki sachchaiyon mein tha

Ada Jafri

---

---