sahil ke sukun se kise inkar hai lekin
tufan se laDne mein maza aur hi kuchh hai

Aal-e-Ahmad Suroor

---

---

jo tere dar se uTha phir wo kahin ka na raha
us ki qismat mein rahi dar-badri kahte hain

Aal-e-Ahmad Suroor

---

---

kuchh to hai waise hi rangin lab o ruKHsar ki baat
aur kuchh KHun-e-jigar hum bhi mila dete hain

Aal-e-Ahmad Suroor

---

---

log mange ke ujale se hain aise marub
raushni apne charaghon ki buri lagti hai

Aal-e-Ahmad Suroor

---

---

mai-kashi ke bhi kuchh aadab baratna sikho
hath mein apne agar jam liya hai tum ne

Aal-e-Ahmad Suroor

---

---

tumhaari maslahat achchhi ki apna ye junun behtar
sambhal kar girne walo hum to gir gir kar sambhle hain

Aal-e-Ahmad Suroor

---

---

ye kya ghazab hai jo kal tak sitam-rasida the
sitamgaron mein ab un ka bhi nam aaya hai

Aal-e-Ahmad Suroor

---

---

wo tabassum hai ki 'ghaalib' ki tarah-dar ghazal
der tak us ki balaghat ko paDha karte hain

Aal-e-Ahmad Suroor

---

---

jahan mein ho gai na-haq teri jafa badnam
kuchh ahl-e-shauq ko dar-o-rasan se pyar bhi hai

Aal-e-Ahmad Suroor

---

---