hai ye pur-dard dastan 'mahrum'
kya sunaen kisi ko haal apna

Tilok Chand Mahroom

---

---

yun to barson na pilaun na piyun ai zahid
tauba karte hi badal jati hai niyat meri

Tilok Chand Mahroom

---

---

ye fitrat ka taqaza tha ki chaha KHub-ruon ko
jo karte aae hain insan na karte hum to kya karte

Tilok Chand Mahroom

---

---

uThane ke qabil hain sab naz tere
magar hum kahan naz uThane ke qabil

Tilok Chand Mahroom

---

---

talatum aarzu mein hai na tufan justuju mein hai
jawani ka guzar jaana hai dariya ka utar jaana

Tilok Chand Mahroom

---

---

saf aata hai nazar anjam har aaghaz ka
zindagani maut ki tamhid hai mere liye

Tilok Chand Mahroom

---

---

na rahi be-KHudi-e-shauq mein itni bhi KHabar
hijr achchha hai ki 'mahrum' visal achchha hai

Tilok Chand Mahroom

---

---

na ilm hai na zaban hai to kis liye 'mahrum'
tum apne aap ko shair KHayal kar baiThe

Tilok Chand Mahroom

---

---

mandir bhi saf hum ne kiye masjiden bhi pak
mushkil ye hai ki dil ki safai na ho saki

Tilok Chand Mahroom

---

---