andaz-e-ghazal aap ka kya KHub hai 'razmi'
mahsus ye hota hai qalam toD diya hai

Muzaffar Razmi

---

---

KHud pukaregi jo manzil to Thahar jaunga
warna KHuddar musafir hun guzar jaunga

Muzaffar Razmi

---

---

koi saughat-e-wafa de ke chala jaunga
tujh ko jine ki ada de ke chala jaunga

Muzaffar Razmi

---

---

mere daman mein agar kuchh na rahega baqi
agli naslon ko dua de ke chala jaunga

Muzaffar Razmi

---

---

mere mahaul mein har samt bure log nahin
kuchh bhale bhi mere hamrah chale aate hain

Muzaffar Razmi

---

---

mujh ko haalat mein uljha hua rahne de yunhi
main teri zulf nahin hun jo sanwar jaunga

Muzaffar Razmi

---

---

qarib aao to shayad samajh mein aa jae
ki fasle to ghalat-fahmiyan baDhate hain

Muzaffar Razmi

---

---

ye jabr bhi dekha hai tariKH ki nazron ne
lamhon ne KHata ki thi sadiyon ne saza pai

Muzaffar Razmi

---

---