musafirana raha is sara-e-hasti mein
chala phira main zamane mein rahguzar ki tarah

Mirza Maseeta Beg Muntahi

---

---

sada-e-qulqul-e-mina mujhe nahin aati
mere sawal ka shishe mein kuchh jawab nahin

Mirza Maseeta Beg Muntahi

---

---

piri hui shabab se utra jhaTak gaya
shaer hun mera misra-e-sani laTak gaya

Mirza Maseeta Beg Muntahi

---

---

phaD hi Dalunga main ek din naqab-e-ru-e-yar
phenk dunga khod kar gulzar ki diwar ko

Mirza Maseeta Beg Muntahi

---

---

na band kar ise fasl-e-bahaar mein saqi
na Dal duKHtar-e-raz ka achaar shishe mein

Mirza Maseeta Beg Muntahi

---

---

latif ruh ke manind jism hai kis ka
piyaada kaun waqar-e-sawar rakhta hai

Mirza Maseeta Beg Muntahi

---

---

KHud rahm kijiye dil-e-ummid-war par
aaphi nikaliye koi surat nibah ki

Mirza Maseeta Beg Muntahi

---

---

sikhla raha hun dil ko mohabbat ke rang-Dhang
karta hun main makan ki tamir aaj-kal

Mirza Maseeta Beg Muntahi

---

---

mujh sa aashiq aap sa mashuq tab howe nasib
jab KHuda ek dusra arz-o-sama paida kare

Mirza Maseeta Beg Muntahi

---

---