manjdhaar mein naw Dub gai to maujon se aawaz aai
dariya-e-mohabbat se 'kausar' yun par utara karte hain

Kausar Niyazi

---

---

zarur teri gali se guzar hua hoga
ki aaj baad-e-saba be-qarar aai hai

Kausar Niyazi

---

---

ye dard ki hai teri mohabbat ki amanat
mar jaenge is dard ka darman na karenge

Kausar Niyazi

---

---

wo mil na sake yaad to hai un ki salamat
is yaad se bhi hum ne bahut kaam liya hai

Kausar Niyazi

---

---

us ne iKHlas ke mare hue diwane ko
ek aawara o badnam sa shaer jaana

Kausar Niyazi

---

---

tujhe kuchh us ki KHabar bhi hai bhulne wale
kisi ko yaad teri bar bar aai hai

Kausar Niyazi

---

---

tabahi ki ghaDi shayad zamane par nahin aai
abhi apne kiye par aadmi sharma hi jata hai

Kausar Niyazi

---

---

parakhne wale mujhe dekh is tarah bhi zara
agar hai khoT to kaise chamak raha hun main

Kausar Niyazi

---

---

main ne har gam use awwal o aaKHir jaana
lekin us ne mujhe lamhon ka musafir jaana

Kausar Niyazi

---

---