diwar-e-KHastagi hun mujhe hath mat laga
main gir paDunga dekh mujhe aasra na de

Aslam Ansari

---

---

hum ko pahchan ki ai bazm-e-chaman-zar-e-wajud
hum na hote to tujhe kis ne sanwara hota

Aslam Ansari

---

---

hum ne har KHwab ko tabir ata ki 'aslam'
warna mumkin tha ki har naqsh adhura hota

Aslam Ansari

---

---

hamare hath faqat ret ke sadaf aae
ki sahilon pe sitara koi raha hi na tha

Aslam Ansari

---

---

jaane wale ko kahan rok saka hai koi
tum chale ho to koi rokne wala bhi nahin

Aslam Ansari

---

---

jise darpesh judai ho use kya malum
kaun si baat ko kis tarah bayan hona hai

Aslam Ansari

---

---

ju-e-naghmat pe taswir si larzan dekhi
lab-e-taswir pe Thahra hua naghma dekha

Aslam Ansari

---

---

KHafa na ho ki tera husn hi kuchh aisa tha
main tujh se pyar na karta to aur kya karta

Aslam Ansari

---

---

kise kahen ki rifaqat ka dagh hai dil par
bichhaDne wala to khul kar kabhi mila hi na tha

Aslam Ansari

---

---