wo bakra phir akela paD gaya hai
ki mera hath bhi Donge mein achchhi boTiyon ko DhunDta hai
wahi bakra
khaDa rakkha gaya hai jis ko kone mein nigahon se chhupa kar
wo jis ki zindagi hai munhasir is baat par
ki hum khaenge kitna
aur kitna chhoD denge bas yun hi apni paleTon mein
abhi kuchh der pahle main khaDa tha pas jis ke
aur jis ke zawiye se dekh kar mahfil ko
aankhen DabDaba aai thin meri
magar wo pal kabhi ka ja chuka tha
ki ab hun mez par main
aur mera hath bhi Donge mein achchhi boTiyon ko DhunDta hai
wo bakra phir akela paD gaya hai
Nazm
Wo bakra phir akela paD gaya hai
Shariq Kaifi