kal wo mili jo bachpan mein mere bhai se khela karti thi
jaane tab kya baat thi us mein mujh se bahut hi Darti thi
par kya hua? wo kahan gai? ab kaun ye baaten jaanta hai
kab itni duri se koi shaklon ko pahchanta hai
lekin ab jo mili hai mujh se aisa kabhi na dekha tha
us ko itni chah thi meri main ne kabhi na socha tha
nam bhi us ne bachche ka mere hi nam pe rakkha tha
phir kahin us se bichhaD na jaun aaise mujh ko takti thi
koi gahri baat thi ji mein jise wo kah bhi na sakti thi
aisi chup aur pagal aanhken damak rahi thin shiddat se
main to sach-much Darne laga tha is KHamosh mohabbat se
Nazm
Watan mein wapsi
Muneer Niyazi