Intizar

muddaten bit gain
tum nahin aain ab tak

roz suraj ke bayaban mein
bhaTakti hai hayat

chand ke ghaar mein
thak-haar ke so jati hai raat

phul kuchh der mahakta hai
bikhar jata hai

har nasha
lahr banane mein utar jata hai

waqt!
be-chehra hawaon sa guzar jata hai

kisi aawaz ke sabze mein lahak jaisi tum
kisi KHamosh tabassum mein chamak jaisi tum

kisi chehre mein mahakti hui aankhon jaisi
kahin abru kahin gesu kahin banhon jaisi

chand se
phul talak

yun to tumhin tum ho magar
tum koi chehra koi jism koi nam nahin

tum jahan bhi ho
adhuri ho haqiqat ki tarah

tum koi KHwab nahin ho
jo mukammal hogi