mulaqaton ka aisa silsila rakkha hai tum ne
badan kya ruh mein bhi rat-jaga rakkha hai tum ne
koi aasan nahin tha zindagi se kaT ke jina
bahut mushkil dinon mein rabta rakkha hai tum ne
hum aise milne walon ko kahan us ki KHabar thi
na milne ka bhi koi rasta rakkha hai tum ne
junun ki haalaton ka hum ko andaza nahin tha
diye ki shah pe suraj ko bujha rakkha hai tum ne
hawa ko habs karna ho to koi tum se sikhe
dariche band darwaza khula rakkha hai tum ne
ab aisa hai ki duniya se ulajhte phir rahe hain
ajab kaifiyaton mein mubtila rakkha hai tum ne
KHizan jaise hare peDon ko ruswa kar rahi hai
suluk aisa hi kuchh hum se rawa rakkha hai tum ne
rihai ke liye zanjir pahnai gai thi
asiri ke liye pahra uTha rakkha hai tum ne
burida aks larzan hain lahu ki wahshaton mein
ye kaisa aaina-KHana saja rakkha hai tum ne
jahan kirdar gunge dekhne wale hain andhe
isi manzar se to parda haTa rakkha hai tum ne
mohabbat karne wale ab kahan ja kar milenge
guzargahon ko to maqtal bana rakkha hai tum ne
Ghazal
Mulaqaton ka aisa silsila rakkha hai tumne
Saleem Kausar