mohlat na mili KHwab ki tabir uThate
hum mare gae TuTe hue tir uThate
mamur thin suraj ki gawahi pe hawaen
phir sae kahan dhup ki jagir uThate
tujh tak bhi pahunchne ke liye waqt nahin tha
kab daulat-e-duniya tere rah-gir uThate
bas ek hi KHwahish sar-e-maqtal hamein yaad aai
zindan se nikalte hue zanjir uThate
us waqt bhi hathon ne qalam ko nahin chhoDa
jab in pe zaruri tha ki shamshir uThate
hum log 'salim' asal se kaT kar nahin jite
kya soch ke aaKHir koi taswir uThate
Ghazal
Mohlat na mili KHwab ki tabir uThate
Saleem Kausar