jab kabhi honge to hum mail-e-gham hi honge
aise diwane bhi is daur mein kam hi honge
hum to zaKHmon pe bhi ye soch ke KHush hote hain
tohfa-e-dost hain jab ye to karam hi honge
bazm-e-alam mein jab aae hain to baiThen kuchh aur
bas yahi hoga na kuchh aur sitam hi honge
jab bhi barbaad-e-wafa koi nazar aae tumhein
ghaur se dekh liya karna wo hum hi honge
koi bhaTka hua baadal koi uDti KHushbu
kaun kah sakta hai ek din ye baham hi honge
Ghazal
Jab kabhi honge to hum mail-e-gham hi honge
Bashar Nawaz