is darja ishq maujib-e-ruswai ban gaya
main aap-apne ghar ka tamashai ban gaya
dair o haram ki rah se dil bach gaya magar
teri gali ke moD pe saudai ban gaya
bazm-e-wafa mein aap se ek pal ka samna
yaad aa gaya to ahd-e-shanasai ban gaya
be-saKHta bikhar gai jalwon ki kaenat
aaina TuT kar teri angDai ban gaya
dekhi jo raqs karti hui mauj-e-zindagi
mera KHayal waqt ki shahnai ban gaya
Ghazal
Is darja ishq maujib-e-ruswai ban gaya
Saghar Siddiqui