honTon pe hansi aankh mein taron ki laDi hai
wahshat baDe dilchasp do-rahe pe khaDi hai
dil rasm-o-rah-e-shauq se manus to ho le
takmil-e-tamanna ke liye umr paDi hai
chaha bhi agar hum ne teri bazm se uThna
mahsus hua panw mein zanjir paDi hai
aawara o ruswa hi sahi hum manzil-e-shab mein
ek subh-e-bahaaran se magar aankh laDi hai
kya naqsh abhi dekhiye hote hain numayan
haalat ke chehre se zara gard jhaDi hai
kuchh der kisi zulf ke sae mein Thahar jaen
'qabil' gham-e-dauran ki abhi dhup kaDi hai
Ghazal
HonTon pe hansi aankh mein taron ki laDi hai
Qabil Ajmeri