achchhi se achchhi aab-o-hawa ke baghair bhi
zinda hain kitne log dawa ke baghair bhi
sanson ka karobar badan ki zaruraten
sab kuchh to chal raha hai dua ke baghair bhi
barson se is makan mein rahte hain chand log
ek dusre ke sath wafa ke baghair bhi
ab zindagi ka koi bharosa nahin raha
marne lage hain log qaza ke baghair bhi
hum be-qusur log bhi dilchasp log hain
sharminda ho rahe hain KHata ke baghair bhi
chaaragari batae agar kuchh ilaj hai
dil TuTne lage hain sada ke baghair bhi
Ghazal
Achchhi se achchhi aab-o-hawa ke baghair bhi
Munawwar Rana