aankhon ko phoD Dalun ya dil ko toD Dalun
ya ishq ki pakaD kar gardan maroD Dalun
yak-qatra KHun baghal mein hai dil meri so us ko
palkon se teri KHatir kyun-kar nichoD Dalun
wo aahu-e-ramida mil jae tira-shab gar
kutta banun shikari us ko bhanbhoD Dalun
KHayyat ne qaza ke jama siya jo mera
aaya na ji mein itna kya is mein joD Dalun
wo sang-dil hua hai ek sang-dil pe aashiq
aata hai ji mein sar ko pattharon se phoD Dalun
baiTha hun KHali aaKHir ai aansuo karun kya
do chaar gokharo hi lao na moD Dalun
taqsir 'mushafi' ki howe muaf sahib
farmao to tumhaare la us ko goD Dalun
Ghazal
Aankhon ko phoD Dalun ya dil ko toD Dalun
Mushafi Ghulam Hamdani