Aankh un ko dekhti hai nazara kiye baghair

aankh un ko dekhti hai nazara kiye baghair
parde mein chhup gae hain wo parda kiye baghair

har-chand dard-e-ishq ka darman nahin magar
banti nahin hai fikr-e-mudawa kiye baghair

zahid se puchhiye gham-e-duniya ki azmaten
uqba na mil saki gham-e-duniya kiye baghair

jate hain dil mein chhoD ke wo jalwa-e-KHayal
bujhti hai shama ghar mein andhera kiye baghair

aksar to dil giraftagi-e-shauq ki qasam
mujh tak wo aa gae hain irada kiye baghair

hum ko bhi dekhna hai ki ye munkarin-e-ishq
kab tak rahenge teri tamanna kiye baghair

sher-o-adab ki rah mein hai gamzan 'shakil'
apne muKHalifin ki parwa kiye baghair