asar zulf ka barmala ho gaya
balaon se mil kar bala ho gaya

Mirza Raza Barq

---

---

hath TuTen main ne gar chheDi hon zulfen aap ki
aap ke sar ki qasam baad-e-saba thi main na tha

Momin Khan Momin

---

---

uljha hai panw yar ka zulf-e-daraaz mein
lo aap apne dam mein sayyaad aa gaya

Momin Khan Momin

---

---

ek mera sar ki qadam-bosi ki hasrat is ko
ek teri zulf ki qadmon se lagi rahti hai

Mubarak Azimabadi

---

---

kuchh bikhri hui yaadon ke qisse bhi bahut the
kuchh us ne bhi baalon ko khula chhoD diya tha

Munawwar Rana

---

---

sarak kar aa gain zulfen jo in maKHmur aankhon tak
main ye samjha ki mai-KHane pe badli chhai jati hai

Nushur Wahidi

---

---

kabhi khole to kabhi zulf ko bikhrae hai
zindagi sham hai aur sham Dhali jae hai

Prem Warbartani

---

---