tumhaari yaad ke jab zaKHm bharne lagte hain
kisi bahane tumhein yaad karne lagte hain

Faiz Ahmad Faiz

---

---

duniya-e-tasawwur hum aabaad nahin karte
yaad aate ho tum KHud hi hum yaad nahin karte

Fana Nizami Kanpuri

---

---

phir kisi ki yaad ne taDpa diya
phir kaleja tham kar hum rah gae

Fani Badayuni

---

---

us ko bhule to hue ho 'fani'
kya karoge wo agar yaad aaya

Fani Badayuni

---

---

KHwabon par iKHtiyar na yaadon pe zor hai
kab zindagi guzari hai apne hisab mein

Fatima Hasan

---

---

zindagi ho to kai kaam nikal aate hain
yaad aaunga kabhi main bhi zarurat mein use

Fazil Jamili

---

---

ab to un ki yaad bhi aati nahin
kitni tanha ho gain tanhaiyan

nowadays even her thoughts do not intrude
see how forlorn and lonely is my solitude

Firaq Gorakhpuri

---

---