yaad mein KHwab mein tasawwur mein
aa ki aane ke hain hazar tariq

Bayan Meeruti

---

---

tumhaari yaad mera dil ye donon chalte purze hain
jo in mein se koi miTta mujhe pahle miTa jata

Bekhud Dehlvi

---

---

aati hai baat baat mujhe bar bar yaad
kahta hun dauD dauD ke qasid se rah mein

Dagh Dehlvi

---

---

lijiye suniye ab afsana-e-furqat mujh se
aap ne yaad dilaya to mujhe yaad aaya

Dagh Dehlvi

---

---

mere qabu mein na pahron dil-e-nashad aaya
wo mera bhulne wala jo mujhe yaad aaya

Dagh Dehlvi

---

---

mujhe yaad karne se ye muddaa tha
nikal jae dam hichkiyan aate aate

Dagh Dehlvi

---

---

wafa karenge nibahenge baat manenge
tumhein bhi yaad hai kuchh ye kalam kis ka tha

Dagh Dehlvi

---

---