kabhi ki thi jo ab wafa kijiyega
mujhe puchh kar aap kya kijiyega

Hasrat Mohani

---

---

ab dilon mein koi gunjaish nahin milti 'hayat'
bas kitabon mein likkha harf-e-wafa rah jaega

Hayat Lakhnavi

---

---

tujh se wafa na ki to kisi se wafa na ki
kis tarah intiqam liya apne aap se

Himayat Ali Shayar

---

---

dasht-e-wafa mein jal ke na rah jaen apne dil
wo dhup hai ki rang hain kale paDe hue

Hosh Tirmizi

---

---

ab to kar Daliye wafa us ko
wo jo wada udhaar rahta hai

Ibn-e-Mufti

---

---

as ek bar hi toDa jahan ne ahd-e-wafa
kisi se hum ne phir ahd-e-wafa kiya hi nahin

Ibrahim Ashk

---

---

kyun pasheman ho agar wada wafa ho na saka
kahin wade bhi nibhane ke liye hote hain

Ibrat Machlishahri

---

---