kisi ko bhej ke KHat hae ye kaisa azab aaya
ki har ek puchhta hai nama-bar aaya jawab aaya

Ahsan Marahravi

---

---

mera KHat us ne paDha paDh ke nama-bar se kaha
yahi jawab hai is ka koi jawab nahin

Ameer Minai

---

---

wo aur wada wasl ka qasid nahin nahin
sach sach bata ye lafz unhin ki zaban ke hain

Ameer Minai

---

---

qasid payam un ka na kuchh der abhi suna
rahne de mahw-e-lazzat-e-zauq-e-KHabar mujhe

Asar Lakhnavi

---

---

pata milta nahin us be-nishan ka
liye phirta hai qasid ja-ba-ja KHat

Bahram ji

---

---

aati hai baat baat mujhe bar bar yaad
kahta hun dauD dauD ke qasid se rah mein

Dagh Dehlvi

---

---

koi nam-o-nishan puchhe to ai qasid bata dena
taKHallus 'dagh' hai wo aashiqon ke dil mein rahte hain

Dagh Dehlvi

---

---