yakum january hai naya sal hai
december mein puchhunga kya haal hai

Ameer Qazalbash

---

---

sal-e-nau aata hai to mahfuz kar leta hun main
kuchh purane se calender zehn ki diwar pa

Azad Gulati

---

---

phir nae sal ki sarhad pe khaDe hain hum log
rakh ho jaega ye sal bhi hairat kaisi

Aziz Nabeel

---

---

ek ajnabi ke hath mein de kar hamara hath
lo sath chhoDne laga aaKHir ye sal bhi

Hafeez Merathi

---

---

ek sal gaya ek sal naya hai aane ko
par waqt ka ab bhi hosh nahin diwane ko

Ibn e Insha

---

---

munhadim hota chala jata hai dil sal-ba-sal
aisa lagta hai girah ab ke baras TuTti hai

Iftikhar Arif

---

---

ek lamha lauT kar aaya nahin
ye baras bhi raegan ruKHsat hua

Inam Nadeem

---

---