ek shakl hamein phir bhai hai ek surat dil mein samai hai
hum aaj bahut sarshaar sahi par agla moD judai hai

Athar Nafees

---

---

kabhi qarib kabhi dur ho ke rote hain
mohabbaton ke bhi mausam ajib hote hain

Azhar Inayati

---

---

dil mein ab kuchh bhi nahin un ki mohabbat ke siwa
sab fasane hain haqiqat mein haqiqat ke siwa

Aziz Warsi

---

---

mohabbat lafz to sada sa hai lekin 'aziz' is ko
mata-e-dil samajhte the mata-e-dil samajhte hain

Aziz Warsi

---

---

na jaane kaun si manzil pe ishq aa pahuncha
dua bhi kaam na aae koi dawa na lage

Aziz-ur-Rahman Shaheed Fatehpuri

---

---

ho gaya jis din se apne dil par us ko iKHtiyar
iKHtiyar apna gaya be-iKHtiyari rah gai

Bahadur Shah Zafar

---

---

marg hi sehat hai us ki marg hi us ka ilaj
ishq ka bimar kya jaane dawa kya chiz hai

Bahadur Shah Zafar

---

---