aane wale jaane wale har zamane ke liye
aadmi mazdur hai rahen banane ke liye

Hafeez Jalandhari

---

---

KHun mazdur ka milta jo na tamiron mein
na haweli na mahal aur na koi ghar hota

Haidar Ali Jafri

---

---

is liye sab se alag hai meri KHushbu 'ami'
mushk-e-mazdur pasine mein liye phirta hun

Imran Aami

---

---

hone do charaghan mahlon mein kya hum ko agar diwali hai
mazdur hain hum mazdur hain hum mazdur ki duniya kali hai

Jameel Mazhari

---

---

inhi hairat-zada aankhon se dekhe hain wo aansu bhi
jo aksar dhup mein mehnat ki peshani se Dhalte hain

Jameel Mazhari

---

---

main ki ek mehnat-kash main ki tirgi-dushman
subh-e-nau ibarat hai mere muskurane se

Majrooh Sultanpuri

---

---

duniya meri zindagi ke din kam karti jati hai kyun
KHun pasina ek kiya hai ye meri mazduri hai

Manmohan Talkh

---

---