logon ne aaram kiya aur chhuTTi puri ki
yakum may ko bhi mazduron ne mazduri ki

Afzal Khan

---

---

kuchal kuchal ke na foot-path ko chalo itna
yahan pe raat ko mazdur KHwab dekhte hain

Ahmad Salman

---

---

phuTne wali hai mazdur ke mathe se kiran
surKH parcham ufuq-e-subh pe lahraate hain

Ali Sardar Jafri

---

---

tu qadir o aadil hai magar tere jahan mein
hain talKH bahut banda-e-mazdur ke auqat

Allama Iqbal

---

---

main ne 'anwar' is liye bandhi kalai par ghaDi
waqt puchhenge kai mazdur bhi raste ke bich

Anwar Masood

---

---

teri zamin pe karta raha hun mazduri
hai sukhne ko pasina muawza hai kahan

Asim Wasti

---

---

main ek mazdur hun roTi ki KHatir bojh uThata hun
meri qismat hai bar-e-hukmarani pusht par rakhna

Ehtisham ul Haq Siddiqui

---

---