kisi na-KHwanda buDhe ki tarah KHat us ka paDhta hun
ki sau sau bar ek ek lafz se ungli guzarti hai

Athar Nafees

---

---

wo taDap jae ishaara koi aisa dena
us ko KHat likhna to mera bhi hawala dena

Azhar Inayati

---

---

pata milta nahin us be-nishan ka
liye phirta hai qasid ja-ba-ja KHat

Bahram ji

---

---

ho chuka aish ka jalsa to mujhe KHat bheja
aap ki tarah se mehman bulae koi

Dagh Dehlvi

---

---

kya kya fareb dil ko diye iztirab mein
un ki taraf se aap likhe KHat jawab mein

Dagh Dehlvi

---

---

ghusse mein barhami mein ghazab mein itab mein
KHud aa gae hain wo mere KHat ke jawab mein

Divakar Rahi

---

---

ashkon ke nishan parcha-e-sada pe hain qasid
ab kuchh na bayan kar ye ibarat hi bahut hai

Ehsan Ali Khan

---

---