KHushi hai sab ko roz-e-id ki yan
hue hain mil ke baham aashna KHush

Meer Mohammadi Bedar

---

---

agar hayat hai dekhenge ek din didar
ki mah-e-id bhi aaKHir hai in mahinon mein

Mirza Raza Barq

---

---

falak pe chand sitare nikalne hain har shab
sitam yahi hai nikalta nahin hamara chand

Pandit Jawahar Nath Saqi

---

---

id ka chand jo dekha to tamanna lipTi
un se taqrib-e-mulaqat ka rishta nikla

Rahmat Qarni

---

---

apni KHushiyan bhul ja sab ka dard KHarid
'saifi' tab ja kar kahin teri hogi id

Saifi saronji

---

---

aai id wa dil mein nahin kuchh hawa-e-id
ai kash mere pas tu aata bajae id

Shaikh Zahuruddin Hatim

---

---

id ko bhi wo nahin milte hain mujh se na milen
ek baras din ki mulaqat hai ye bhi na sahi

Shola Aligarhi

---

---